من طبعي يوميا استمع إلى حصاد أخبار قناة الشرقية .. وإذا بالحاجة أم رحومي تناديني بأعلى صوتها وتقول ( ابو رحومي تعال اسمع انكَلبت الدنيا احمد أبو قناة الشرقية يذيع بشرى للشعب العراقي ) .. نزلت من الطابق العلوي لأسمع البشرى مال ( أستاذ احمد ) للشعب ، وعند وصولي إلى التلفزيون ( انكَطعت الكهرباء ) .. استفسرت من الحاجة ( أم رحومي ) ( خير شنو البشرى ) قالت ( ما ادري بس مذيع الشرقية أستاذ احمد كَلب الدنيا ) .. خرجت مسرعا إلى جاري (أبو ستوري) لاستفسر منه عن البشرى التي أعلنها ( أستاذ احمد ) للشعب العراقي وبالصدفة شاهدت ( أبو ستوري كَاعد على عتبة الباب ) .. ودار الحوار التالي : ابو رحومي : ها أبو ستوري اكو شي طلع بالشرقية . أبو ستوري : عيني ابو رحومي اشو انكَلبت الدنيا اليوم .. الطرق مسدودة والجيش والشرطة والميليشيات كلها بالشوارع .. وما اكووا احد من المواطنين كلهم ببيوتهم ، بس السيارات مال الأحزاب والميليشيات خبصونه ب ( الطاط والطيط ) ، والسوكَ كله عزل ، وجبار الكَصاب سد تكانة ، والبانزيخانة طفت اضويتها ، يكَولون راح أيصير منع تجوال شنو القصة .. ما اعرف ؟؟؟؟؟؟؟ . ابو رحومي : أخاف طبت مفخخات وكواتم للميليشيات من جيرانا ذوله ؟ . أبو ستوري : لا .. يابه .. لا ؟ وإذا طبت شنوا راح الحكومة تكَلب الدنيا .. اشووا هي الحكومة أتريدها أطب ابغداد والعراق كله ، أو وين ما تريد أطب أطب حتى لو أبدول الجيران ؟ . ابو رحومي : لعد أخاف أجا مسؤول أمريكي جبير على الجماعة بالمنطقة الخضراء ؟ أبو ستوري : لا .. يابه .. لا ؟ . ابو رحومي : أيجوز احتمال اكو مؤتمر للجامعة العربية لحقوق الإنسان العراقي بفندق الرشيد ؟ أبو ستوري : لا .. يابه .. لا ؟ هاي اشبيك ابو رحومي بعدك امصدكَ أبحقوق الإنسان . ابو رحومي : زين يمكن وصلت الأسلحة الروسية اللي صار من وراها (قال وقلت وفضحت الجماعة بالتلفزيونات) ؟ أبو ستوري : لا .. يابه .. لا ؟ . ابو رحومي : لعد شنوا احتمال انبش أبو واحد من الجماعة بالمنطقة الخضراء ؟ أبو ستوري : لا .. يابه .. لا ؟ ابو رحومي : لعد أيجوز اكو اجتماع مهم للي فازوا بانتخابات مجلس بغداد حتى يسهلوا سفر ألي (باكَوا ) من أهل المجلس السابق للخارج ؟ أبو ستوري : لا .. يابه .. لا ؟ ابو رحومي : لعد شكوا من أنهجم بيتك وبيوتهم ؟ أبو ستوري : لك أنطيني مجال أشوف أم ستوري اشسمعت بالتلفزيون ؟ . ونادى أبو ستوري أم ستوري وقال لها : أبو ستوري : أم ستوري هاي وينج ؟ أم ستوري : هاي شبيك .. دا انكَع الباكَلا حتى نتريكَ بيها باجر الصبح . أبو ستوري : ايكولون احمد أبو الشرقية ذاع بشرى للشعب العراقي بالتلفزيون ؟ أم ستوري : يا أبشارة أبو ستوري .. الرجال احمد أبو الشرقية كَال أصالحوا ذوله الكلاوجية الحرامية !!!. أبو ستوري : لج اشد تحجين هيا مال شقا .. منو ذوله الكلاوجية والحرامية ؟ مو ابو رحومي يمي ويريد يعرف شنوا البشرى؟. أم ستوري : ليش آني مشاقيه كَبل وياك .. هذا احمد أبو الشرقية ايكَول أتباوسو أسومي أبو البرلمان وملوكي أبو الحكومة واللي باوسهم حكومي أبو طمغة البيتنجان ؟ أبو ستوري : ليش همه أشبيههم حتى يتباوسون .. شنوا جانو متعاركين كَبل حتى يتصالحون ؟ أم ستوري : وشم عرفني قابل آني وياهم .. أبو ستوري ليش ما تعرف ذول الحرامية يطلعون يوميه بالتلفزيون متعاركين وبالليل دك وركَص أو بوس للصبح .. بس شنسوي مقشمرينا وإحنا امصدكَيهم .. من طيح الله حظهم وحظنا اللي جابههم وجابنا عليهم . ندس ابو رحومي أبو ستوري وقال له : أبو ستوري صدك لو كال معروف الرصافي الله يرحمه : أيا سائلا عنَّا ببغدادَ إننا بهائم في بغداد أعوزها النبت علَتْ أمَّة الغرب السماءَ وأشرقتْ علينا فظَلنا نَنظر القوم من تحت وهم ركضوا خيلَ المساعي وقد كبا بنا فرَس عن مِقنَب السعي مُنْبَت فنحن أناس لم نزل في بطانة كأنَّا يهود كلُّ أيامنا سبت خضعنا لحكام تجور وقد حلا بأفواهها من مالنا مأكل سحت وكم قامرتنا ساسة الأمر خدعة ً فتم علينا بالخِداع لها الدسْتُ
